Доцент, доктор Вакур Сүмер семинарында Түркітілдес мемлекеттердің ынтымақтастық кеңесінің бірінші төтенше саммиті өткенін атап өтіп, оның символдық мағынасы бар екенін айтты. Әзірбайжан Президенті Ильхам Әлиевтің бастамасымен шақырылған бұл Саммитке Қазақстан Президенті Қасым-Жомарт Тоқаев, Қырғызстан Президенті Сооронбай Жээнбеков, Түркия Президенті Режеп Тайып Ердоған, Өзбекстан Президенті Шавкат Мирзиеев, Түрікменстан Президенті Гурбангулы Бердімұхамедов, Венгрия Премьер-министрі Виктор Орбан, Дүниежүзілік денсаулық сақтау ұйымының Бас директоры Тедрос Адханом Гебрейесус қатысқанын атап өтті.
2020 жылы 10 сәуірде өткен Түркі кеңесінің төтенше саммитінде Түркия Президенті Режеп Тайып Ердоған қозғаған мәселелерге тоқталған доцент, доктор Вакур Сүмер, Ердоғанның Каспий теңізі арқылы ортақ көлік дәлізін дағдарыс кезеңінде тез әрі ешқандай қиындықсыз пайдаланудың маңыздылығына назар аударғанын айтты. Сондай-ақ, Ердоғанның қазіргі уақытта Түркия, Әзірбайжан және Грузия арасында құрылған Баку-Тбилиси-Карс теміржол жобасын Орталық Азияға дейін кеңейту мәселесін де қарастырғанын атап өткен доцент, доктор Вакур Сүмер осы мақсатқа жету үшін Каспий теңізі арқылы ортақ көлік дәлізін жеделдетудің маңызы зор екенін баяндады. Ал Қазақстан Президенті Қасым-Жомарт Тоқаевтың «Түркі келешегі-2040» атты бағдарлама туралы сөз қозғағанын тілге тиек еткен доцент, доктор Вакур Сүмер Қазақстан Президентінің әсіресе денсаулық сақтау саласын бағдарламаға енгізу қажеттігін баса айтқанын жеткізді.
Семинар жалғасында доцент, доктор Вакур Сүмер Түркітілдес мемлекеттердің ынтымақтастық кеңесінің тарихына тоқталып, Кеңестің Түркия Республикасының бастамасымен өткізілген «Түркітілдес мемлекет басшыларының саммиттерінен» бастау алған ұзақ үдеріс нәтижесінде құрылғанын айтты. Аталған Саммиттер кезінде маңызды жетістіктерге қол жеткізілгенін айта келе, доцент, доктор Вакур Сүмер 1992-2009 жылдар аралығын Түркітілдес мемлекеттердің ынтымақтастық кеңесі құрылғанға дейінгі және оған негіз болған кезең ретінде қарастыруға болатынын тілге тиек етті. Сүмер Қазақстан Республикасының Тұңғыш Президенті – Елбасы Нұрсұлтан Назарбаевтың бастамасымен қол қойылған 2009 жылғы Нахчыван келісімінен бастау алған кезең 2018-2019 жылдары жаңа толқынмен дами бастағанын айтты.
Семинар соңында доцент, доктор Вакур Сүмер 2019 жылдан бастап Өзбекстанның да Түркі кеңесінің мүшелігіне өткенін атап өтіп, 2018 жылы басталған үдерісті қарастырған кезде Түркітілдес мемлекеттердің ынтымақтастық кеңесі одан әрі нығайып, күшті халықаралық ұйымға айналғанын баса айтты.