Еуразия ғылыми-зерттеу институтының директоры доцент, доктор Вакур Сүмердің кіріспе сөзімен басталған семинарда в.ғ.к., профессор Қайсар Табынов, өз сөзінде бүкіл әлем COVID-19 пандемиясымен әлі де күресіп жатқанын айта отырып, Қазақстан мысалында эпидемияға қарсы вакциналық зерттеулердің соңғы жағдайын түсіндірді. Кейбір аймақтарда оптимистік жағдай болғанымен, жалпы эпидемия қаупі артып келе жатқанын айтқан в.ғ.к., профессор Табынов ешбір мемлекет қысқа мерзімде эпидемияға қарсы шектеулерді жоймайтынын баса айтты. Семинардың жалғасында, профессор Табынов, вакцина жұқпалы ауруларға қарсы иммунитетті қалыптастыруға арналған медициналық немесе ветеринариялық иммунобиологиялық препарат екенін айта келе, вакцинаның әлсіреген немесе жойылған микроорганизмдерден, олардың метаболизм өнімдерінен, гендік инженерия немесе химиялық жолмен алынған антигендерден қалай жасалатынын түсіндірді.
Қазіргі уақытта әр елде COVID-19-ға қарсы вакцинация бойынша түрлі зерттеулер жалғасып жатқанына тоқталған профессор Табынов өзінің зерттеу тобымен осы кезеңге дейін осы салада көп зрттеулер жасағандықтарын мәлімдеді. Атап айтқанда, өзі жұмыс істейтін ҚазҰАЗУ Халықаралық вакцинация орталығы Алматы қаласындағы М.Айқымбаев атындағы аса қауіпті инфекциялар Ұлттық ғылыми орталығымен (АҚИҰҒО) бірлесе отырып, COVID-19-қа қарсы вакциналау жұмыстарын жалғастырып жатқандығын баса айтты. Қазақстандағы биологиялық қауіпсіздікті, фундаменталды және қолданбалы ғылыми-зерттеу жұмыстарын қамтамасыз етуге арналған М.Айқымбаев атындағы АҚИҰҒО жанынан құрылған Орталық референс-зертханасы тек Қазақстанда ғана емес, Орталық Азиядағы ABSL-3 дәрежелі (биоқауіпсіздік деңгейі 3) жалғыз зертхана болып табылады.
ҚазҰАЗУ Халықаралық вакцинация орталығының көптеген маңызды вакцина зерттеулері мен жобаларын жасағанын айтқан профессор Табынов, аталмыш орталықта вакциналардың өндірісі мен зертханада сыналуы үшін қолайлы жабдықтармен қатар, Қазақстанда бір қатар пандемияға қарсы вакциналар жасап, денсаулық сақтау қызметінде қолданысқа енгізетін білікті мамандардың бар екенін атап өтті. Орталықтың жануарларға, құстарға және адамдарға арналған вакциналардың әртүрлі буындарын зерттеу, өндіру және қолдану бойынша көп жұмыс жасағанына тоқталған профессор Табынов, соңғы 17 жыл ішінде өздерінің зерттеу тобымен бірге жоғары патогенді құс тұмауы, бруцеллез, A/H5N1 құс тұмауы мен A/H1N1 шошқа тұмауы сияқты аса қауіпті инфекцияларға қарсы ветеринарлық 7 вакцина мен медициналық 3 вакцинаны сәтті жасап шығарғандарын жеткізді. Сонымен қатар, қазіргі таңда осы вакциналардың шамамен 60%-ы табысты түрде қолданысқа және өндіріске енгізіліп жатқандығын мәлімдеді.
Семинар соңында қатысушылар тақырып бойынша өзара пікір алмасты. Еуразия ғылыми-зерттеу институтының директоры, доцент, доктор Вакур Сумер, қызықты семинары үшін в.ғ.к., профессор Қайсар Табыновқа алғысын білдіріп, вакцина зерттеу жұмыстарына сәттілік тіледі.