PhD докторы Насиба Джунаева семинарында қазіргі таңда әйел мәселесі туралы ғылыми зерттеулер күн тәртібінде тұрғандығына назар аудара отырып, XIX ғасырдың басындағы әйел тақырыбындағы әдеби шығармалар туралы баяндады. Ол қазақ әйелдерінің өмірде кездескен мәселелерінің себептерін түсіндіріп, қазақ зиялыларының пікірлерімен бөлісті. Сондай-ақ, аталған мәселелерді жою бойынша Қазақстанда атқарылып жатқан шаралар туралы айтты.
Семинар жалғасында PhD докторы Насиба Джунаева қазақ әдеби туындыларынан мысалдарын келтіріп, диссертация жазу барысында зерттеген романдар мен әңгімелерге тоқталып өтті. Ол осы романдардағы әйелдердің рөлі мен жазушылардың көзқарасын түсіндірді. Насиба Джунаева өз жұмысында қазақ әдебиетіндегі төрт прозалық шығарма – екі роман («Бақытсыз Жамал», 1910; «Ұлпан», 1974;) және екі әңгіме («Шұғаның белгісі», 1914; «Қорғансыздың күні», 1921) мәтіндеріне талдау жасағандығы туралы мәлімет берді. Баяндамашы бүгінгі таңда әйелдердің әлеуметтік өмірі қарастырылған шығармалардағы әйелдердің жағдайымен бірдей емес екенін айта келе, бұл тақырыптағы зерттеулерді халықаралық конвенцияларға сәйкес жүргізу керектігін тілге тиек етті.
Семинар соңында қатысушылар өзара сұрақтармен алмасты. Бүгінгі күнгі әйелдер мәселесі бойынша пікір алмасқан қатысушылар посткеңестік және қазіргі қазақ әйелдерінің жағдайын салыстырды. Семинар сертификат табыстаумен аяқталды.