2020 жылы 9 қаңтарда Еуразия ғылыми-зерттеу институты директорының орынбасары Женгизхан Жаналтай «Түркияның сыртқы саудасының динамикасы: Түркия-Әзербайжан қатынастары» тақырыбында семинар өткізді.

Женгизхан Жаналтай семинарында Түркия Республикасы 1991 жылы 30 тамызда Әзербайжан Республикасының тәуелсіздігін алғаш таныған мемлекет екенін атап өтіп, Түркия мен Әзербайжан арасындағы бауырластық қатынастар стратегиялық әріптестік деңгейіне жеткенін айтты. Екі елдің бір-бірімен көрші болуы, мәдени ұқсастықтары және бірқатар сыртқы саяси көзқарастарының ұштасып жатуы екіжақты қатынастардың оң бағытта дамуын қамтамасыз етеді. Женгизхан Жаналтайдың айтуы бойынша, Түркия Әзербайжанның маңызды сауда әріптесі болып табылады. Сонымен қатар, Түркия Әзербайжанның импорты мен экспортындағы ең ірі әріптестер тізімінде екінші орында тұр. Алайда, Түркия үшін Әзербайжанмен саудасы басқа елдермен салыстырғанда әлдеқайда аз. Әзербайжанның Түркияға жыл сайынғы экспорты 3 млрд. доллардан асады, ал импорты шамамен 2 млрд. долларға жетеді. Семинар жалғасында Женгизхан Жаналтай Әзербайжанның Түркияға экспортында үлкен ауытқулар болғанын атап өтті. Әзербайжан экспортының толықтай дерлік табиғи газ бен мұнайдан тұруы және энергия бағасының өзгеруі Әзербайжанның сыртқы сауда көлемінің ауытқуына әкеліп соғатынын айтты. Сонымен қатар, 2014 жылы Әзербайжан валютасының, ал 2019 жылы Түркия валютасының құнсыздануы екі ел арасындағы экономикалық қатынастарға кері әсерін тигізгенін де тілге тиек етті. Екі ел арасындағы өзара инвестициялар әлі де қажетті деңгейде емес. Женгизхан Жаналтай 2018 жылы Әзербайжанның Түркияға жасаған инвестициялары 516 млн. долларды құрағанын, ал Әзербайжанның Түркияға тікелей инвестициялары 489 млн. доллар шамасында болғанын атап өтті. Баяндамашы мұны Әзербайжан экономикасының жеткілікті әртараптандырылмауы және кедендік баж салықтарының жоғары болуы сияқты құрылымдық экономикалық мәселелермен түсіндірді. Семинар соңында қатысушылар сұрақтар қойып, өзара  пікір алмасты.