2019 жылдың 25 қыркүйегінде әл-Фараби атындағы Қазақ ұлттық университетінің докторанты Балжан Ешметова «Мәңгілік ел идеясы: Түркі елдерінің біртұтастығы» атты тақырыпта семинар өткізді.
Балжан Ешметова семинарында Қазақстан Республикасының Тұңғыш Президенті – Елбасы Нұрсұлтан Әбішұлы Назарбаевтың «Мәңгілік ел» идеологиясының тарихы туралы баяндады. Ешметова Орхон-Енисей жазбаларынан мысалдар келтіре отырып, «мәңгі» деген сөздің Күлтегін жазба ескерткішінде төрт рет кездесетінін және бұл сөздің көне түркі дәуірінен басқа жазбаларда да қолданылғанын айтты. Ол «Мәңгілік ел» идеясының түркі халықтары үшін үлкен маңызға ие болғанын тілге тиек етті.
Семинар жалғасында Балжан Ешметова «Мәңгілік ел» идеясының түркі дәстүрлері мен әдет-ғұрыптарын ұрпақтан ұрпаққа жеткізуге себептес болғанын және бұл идеяның қазіргі таңда да түркі халықтарының өзара ынтымақтастығы мен бірлігін қамтамасыз етуде маңызды рөл атқаратынын атап өтті.
Семинар соңында қатысушылар тақырып бойынша өзара пікір алмасты. Еуразия ғылыми-зерттеу институтының директоры доцент, доктор Вакур Сүмер Балжан Ешметоваға жасаған мазмұнды баяндамасы үшін алғыс айтып, сертификат табыс етті.
