2022 жылдың 1 шілдесінде Ирантану орталығының (IRAM) аға ғылыми қызметкері, доцент, доктор Үміт Башар «Ауғанстандағы ағымдағы оқиғалар және аймақтық әсерлері» атты онлайн семинар өткізді.
Еуразия ғылыми-зерттеу институтының директоры, доктор Суат Бейлурдың кіріспе сөзінен кейін баяндамасын бастаған Ирантану орталығының аға ғылыми қызметкері және Анкара әлеуметтік ғылымдар университетінің оқытушысы доцент, доктор Үміт Башар Ауғанстандағы қазіргі оқиғалар және олардың аймақтық әсерлері туралы жан-жақты ақпарат берді. Екінші Талибан дәуірінің басталуы және Ауғанстан ислам республикасының құлауы туралы қысқаша айта отырып, доцент, доктор Үміт Башар Ауғанстандағы оқиғалардың Түркия мен Қазақстанға ықтимал әсері туралы айтты. Ауғанстанда біртұтас әкімшіліктің құрылғанын атап өтіп, Ауғанстанның ең негізгі мәселелерінің бірі Талибанның әкімшілікті қолға алғаннан кейін билікті толық бөлісе алмауы екенін тілге тиек етті. Екінші жағынан, ол Ауғанстандағы саяси және әскери тұрақтылықты қамтамасыз етуде түрлі мәселелерге тап болғанын атап көрсетті. Оның айтуынша, осы мәселелердің ішінде әртүрлі лаңкестік ұйымдардың Талибанға қарсы көзқарасы елдегі қауіпсіздікке кері әсер етуі мүмкін.
Семинардың жалғасында доцент, доктор Үміт Башар негізгі қажеттіліктер тұрғысынан көптеген мәселелер бар екенін және азық-түлік табуда қиындықтар бар екенін білдірді. Ауғанстандағы, әсіресе көршілес елдердегі жағдайдың жаһандық әсерін айта келе, ауған босқындарының қиындықтары туралы түрлі мәліметтер берді. Ол жалпы перспективада Ауғанстандағы тұрақсыздықтың аймақтық энергетика, көлік және сауда жолдары тұрғысынан келеңсіз салдары болуы мүмкін екенін, бұл мәселелер көрші елдер мен аймақтағы маңызды субъектілерді алаңдатып отырғанын баяндады.
Семинар соңында қатысушылар тақырып бойынша пікір алмасты. Еуразия ғылыми-зерттеу институтының директоры, доктор Суат Бейлур семинарда құнды ақпараттармен бөліскенін айтып, доцент, доктор Үміт Башарға алғысын білдірді.
