2020 жылы 4 маусымда Еуразия ғылыми-зерттеу институтының ғылыми қызметкері Илана Даутова «Оңтүстік Корея мен Орталық Азия елдері арасындағы қазіргі экономикалық байланыстар» тақырыбында семинар өткізді.
Илана Даутова семинарында Орталық Азияның Оңтүстік Корея үшін экономикалық тұрғыдан тартымды аймақ екенін түсіндіре келе, аймақ елдерінің жер асты қазба байлықтары тұрғысынан бай ресурстарға ие екендігін атап өтті. Баяндамашы 1992 жылдан 2010 жылға дейін Оңтүстік Корея мен Орталық Азия елдері арасындағы жалпы сауда көлемі 180 есеге артқанын атап өтіп, Оңтүстік Кореяның Орталық Азияның барлық елдерімен экономикалық байланыстары туралы ақпарат берді. Илана Даутова аталмыш елдер арасындағы экспорт және импорт көлемдерінің статистикалық мәліметтеріне тоқтала отырып, Орталық Азияда жалпы қанша Оңтүстік Кореялық компания жұмыс істейтіндігін баяндады.
Семинар барысында Илана Даутова Қазақстан мен Өзбекстанның Оңтүстік Кореяның аймақтағы негізгі экономикалық серіктестері екенін тілге тиек етіп, осы елдердегі мұнай және газ өндірісіне байланысты көптеген жобаларға Оңтүстік Корея тарапынан инвестиция салынғанын мәлімдеді. Аталмыш екі елге қарағанда Түрікменстан, Тәжікстан және Қырғызстанға Оңтүстік Корея тапырынан аз инвестиция салынғандығын сөз еткен Илана Даутова, бұл елдердің де күн сайын Оңтүстік Кореямен белсенді экономикалық байланыстарды дамытып келе жатқанын баяндады.
Семинар соңында Илада Даутова Оңтүстік Корея мен Орталық Азия елдері арасындағы экономикалық байланыстардың маңыздылығына назар аударта отырып, Орталық Азиядағы бес мемлекет бұл қатынастардан үлкен пайда көретіндігін айтты. Илана Даутова, Оңтүстік Корея мен Орталық Азия елдері арасындағы қатынастар аймақтар арасындағы экономикалық ынтымақтастықтың үлгісі екендігін атап өтіп баяндамасын аяқтады.
